Ժողովրդագրական իրավիճակի բարելավման խորհրդի նիստին, որը գլխավորում էր ՀՀ փոխվարչապետ Համբարձում Մաթևոսյանը, ներկայացվեց Հայաստանի ժողովրդագրական իրավիճակի բարելավման ռազմավարության վերլուծական մասը։
Այն ներառում էր ինչպես հիմնական ժողովրդագրական գործոնների մանրակրկիտ վերլուծությունը, այնպես էլ ժողովրդագրական կանխատեսումների մոդելը, որը դրվելու է բուն ռազմավարության հիմքում. այսինքն՝ ինչու և ինչ է սպասում մեզ ժողովրդագրական տեսանկյունից։
Ռազմավարությունը մշակում է Աշխատանքի և սոցիալական հարցերի նախարարությունը` ՄԱԿ-ի Բնակչության հիմնադրամի հայաստանյան գրասենյակի աջակցությամբ և «Ամերիա» խորհրդատվական ընկերության հետ համագործակցությամբ: Փաստաթղթի մշակմանը ներգրավված են նաև ժողովրդագրական հետազոտությունների ոլորտում առաջատար ինստիտուտներ` Վիտգենշտեյնի ժողովրդագրության ու համաշխարհային մարդկային կապիտալի կենտրոնը և Պրահայի Չարլզի համալսարանը, ինչպես նաև ՄԱԿ-ի Բնակչության հիմնադրամի ժողովրդագրական փորձագետներ:
Հայաստանի ժողովրդագրական ռազմավարության մշակմանն աջակցությունը տրամադրվում է CISPop «Ավելի լավ տվյալներ՝ ավելի լավ քաղաքականությունների համար» ծրագրի շրջանակներում, որը ՄԱԿ-ի Բնակչության հիմնադրամի տարածաշրջանային ծրագիր է՝ Ռուսաստանի Դաշնության ֆինանսավորմամբ, և նպատակ ունի ուժեղացնել ԱՊՀ տարածաշրջանում բնակչության տվյալների հավաքագրումը, վերլուծությունը և օգտագործումը ապացույցների վրա հիմնված քաղաքականության մշակման համար:
Հայաստանի ժողովրդագրական ռազմավարության մշակումը հրատապ անհրաժեշտություն ունի՝ հաշվի առնելով երկրի առջև ծառացած ժողովրդագրական մարտահրավերները և դրանց ունեցած էական ազդեցությունը երկրի զարգացման վրա, ինչպես նաև ներկայիս պետական քաղաքականության մշակման և որոշումների կայացման գործընթացում ժողովրդագրական գործոնների դիտարկման հրամայականը:
Ժողովրդագրական ռազմավարության վերջնական տարբերակը կքննարկվի Վիտգենշտեյնի ժողովրդագրության և համաշխարհային մարդկային կապիտալի կենտրոնում, որից հետո կդրվի հանրային քննարկման։
