ՄԱԿ-ի Բնակչության հիմնադրամը մեծագույն սիրով շնորհավորում է կանանց և աղջիկներին մարտի 8-ի՝ Կանանց միջազգային տոնի կապակցությամբ և մաղթում այնպիսի աշխարհ, որտեղ նրանց հսկայական ներուժն իր լիարժեք արտահայտությունը կստանա, որտեղ նրանք սիրված և փայփայված կլինեն տարվա բոլոր օրերին և որտեղ մայրությունն ապահով և անվտանգ կլինի:
Այս տարի՝ 2013 թ.-ին, ՄԱԿ-ի որոշմամբ, մարտի 8-ը ողջ աշխարհում նշվելու է կանանց նկատմամբ բռնության դեմ պայքարի նշանաբանի ներքո:
Հայացք Հայաստանի կանանց.
Ավելի երկար են ապրում. Մեր կանայք միջինը գրեթե յոթ տարի ավելի երկար են ապրում, քան տղամարդիկ՝ 77.5 և 70.7:
Ավելի քիչ են ծնվում. Հղիության սեռով պայմանավորված արհեստական ընդհատման պատճառով Հայաստանում տարեկան չի ծնվում միջինը 1400 աղջիկ:
Գնալով ավելի ուշ են ամուսնանում. Հայաստանում կանայք ամուսնանում ավելի ու ավելի ուշ. եթե 2001 թ.-ին նրանց ամուսնական միջին տարիքը 22.8 էր, ապա 2011-ին՝ 25: Ընդ որում, որքան կրթվում են, այնքան ուշ են ամուսնանում:
Երեխաներ՝ շատ ուզում են, քիչ ունենում. եթե 1970-ականներին մեկ հայաստանցի կնոջը բաժին էր ընկնում միջինը երեք երեխա, ապա այժմ՝ ուղիղ կեսը կամ, այլ կերպ ասած, երկու կին են ունենում միջինը երեք երեխա: Բայց իդեալական համարում են մեկ կնոջ 2-3 երեխա ունենալը:
Անպտղություն. անպտղության ցուցանիշը Հայաստանի կանանց համար բարձր է՝ 16.8 տոկոս, ինչը գերազանցում է Առողջապահության համաշխարհային կազմակերպության սահմանած ճգնաժամային ցուցանիշը (15%): Սա նշանակում է, որ մոտավորապես յուրաքանչյուր վեց կնոջից մեկը չի կարողանում երեխա ունենալ:
Տունը՝ կանանց ուսերին. Մեր կանայք տնային տնտեսությանը և երեխաների խնամքին տրամադրում են մոտ 5 անգամ ավել ժամանակ, քան տղամարդիկ:
Կարդում են. գրադարանների ընթերցողների մոտ երկու երրորդը կանայք և աղջիկներն են:
Աղքատություն. մեր երկրի ամեն երրորդ կին (34.5 տոկոսը), աղքատ է:
Բռնություն. Հայաստանում մոտավորապես յուրաքանչյուր 10 կնոջից 6-ը ենթարկվում է հոգեբանական բռնության, 10 կնոջից 1-ը՝ ֆիզիկական բռնության, իսկ ֆիզիկական բռնության ենթարկված ամեն 5 կնոջից 4-ը՝ սեռական բռնության:
ՄԱԲՀ գործադիր տնօրենի ուղերձը 2013 թ. մարտի 8-ի՝ Կանանց միջազգային օրվա կապակցությամբ
