«ՎԻՆՆԵԹ Հայաստան» կանանց ռեսուրս կենտրոնների ցանցի անդամները հավաքվել էին համակարգող հանդիպմանը՝ կիսվելու իրենց ձեռքբերումներով, քննարկելու մարտահրավերներն ու բացահայտելու նոր հնարավորություններ:
ՄԱԿ-ի Բնակչության հիմնադրամի հայաստանյան գրասենյակի աջակցությամբ 2023 թվականի հոկտեմբերի 20-22-ը տեղի ունեցած համակարգող հանդիպումը կազմակերպվել էր Եվրոպական միության կողմից ֆինանսավորվող «Ապագան այսօր. կանանց, երիտասարդների և երեխաների հզորացում հանուն Հայաստանում ժողովրդավարության ամրապնդման» ծրագրի շրջանակներում։
«Այս երեք օրերը մեզ համար լավ առիթ էին համախմբվելու, գնահատելու մեր առաջընթացը և քննարկելու քաղված դասերը։ Նաև լավ հնարավորություն ունեցանք ձեռք բերելու նոր հմտություններ և գիտելիք»,- ասաց «ՎԻՆՆԵԹ Հայաստան» Կանանց ռեսուրս կենտրոնների ցանցի խորհրդի անդամ Նվարդ Խաչատրյանը։
Հոգեսոցիալական կարգավորման կենտրոնի հոգեբանական ծառայության համակարգող Լիլիթ Բաղդասարյանի օգնությամբ մասնակիցներն ուսումնասիրեցին աշխատանքային սթրեսի և մասնագիտական այրման ազդեցությունը, ինչպես նաև բացահայտեցին սթրեսի կառավարման և հաղթահարման մեթոդները:
Հանրային և մեդիա հաղորդակցության թեմայով աշխատարանի ընթացքում մասնակիցները ծանոթացան գրագետ հաղորդակցման ուղիներին: Ներկայացվեցին նաև բրենդի զարգացման և տարածման սկզբունքները` ընդգծելով կանանց ռեսուրս կենտրոնների սոցիալական ձեռնարկությունների գրագետ հաղորդակցության և բրենդավորման կարևորությունը:
Համակարգող հանդիպման մասնակիցները մշակեցին մարդկային ազդեցիկ պատմությունների գաղափարներ՝ «Ապագան այսօր» ծրագրով ստեղծված «ՎԻՆՆԵԹ Հայաստանի» պաշտոնական կայքի համար։
«Այս համակարգող հանդիպմանը համագործակցության և գիտելիքների փոխանակման ականատեսը եղանք: Մենք ոչ միայն նշեցինք ծրագրի ընթացքում մեր ձեռքբերումները, այլև ամենակարևորը, քննարկեցինք, թե ինչպես էլ ավելի ամրապնդել մեր հանձնառությունը Հայաստանում կանանց հզորացման հարցում»,- ասաց ՄԱԲՀ հայաստանյան գրասենյակում «Ապագան այսօր» ծրագրի ղեկավար Էդուարդ Իսրայելյանը։
Մասնակիցները ներգրավվեցին ռազմավարական պլանավորմանն ուղղված քննարկումների մեջ և ուսումնասիրեցին կանանց ռեսուրս կենտրոնների գործունեության կայունությունն ապահովելու գործողությունները:
«Մեր գործունեության ամուր հիմքը դրվեց «Ապագան այսօր» ծրագրի շնորհիվ։ Մեր համակարգված ջանքերն ու ձեռքբերումները ՄԱԿ-ի Բնակչության հիմնադրամի և այս ծրագրի աջակցության արդյունք էին: Վստահ շարունակելու ենք մեր ջանքերը նաև ծրագրի ավարտից հետո»,- ընդգծեց «Ապագան այսօր» ծրագրի աջակցությամբ հիմնադրված «ՎԻՆՆԵԹ Բերդ» հիմնադրամի տնօրեն Հասմիկ Ղալումյանը։
Այս հրապարակումը պատրաստվել է Եվրոպական միության ֆինանսական աջակցությամբ՝ Եվրոպական միության կողմից ֆինանսավորվող «Ապագան այսօր. Կանանց, երիտասարդների և երեխաների հզորացում հանուն Հայաստանում ժողովրդավարության ամրապնդման» ծրագրի շրջանակներում։
Բովանդակության համար պատասխանատվություն է կրում ՄԱԿ-ի Բնակչության հիմնադրամի հայաստանյան գրասենյակն, ու պարտադիր չէ, որ այն արտահայտի Եվրոպական միության տեսակետները:
