Ուղեցույցի նպատակն է. բարելավել նախադեռահասային և դեռահասային տարիքում բակտերիալ վագինոզի ախտորոշումը և բուժումը, օպտիմալացնել հակաբիոտիկների կիրառումը, տրամադրել ապացուցողական խորհուրդներ` վագինոզի կանխարգելման և արդյունավետ վարման նպատակով, բարելավել տվյալ խմբի պացիենտների վարման ելքերը: Ուղեցույցը չի հակասում, այլ հիմնվելով ապացուցողական բժշկության արդի եվրոպական, ամերիկյան, կանադական, ավստրալիական գրականության վրա, լրացնում է գործող չափորոշիչները, հատկապես անդրադառնալով այնպիսի կլինիկական խնդիրների, որոնք լուսաբանված չեն առկա փաստաթղթերում: Ուղեցույցը չի ներառում տրիխոմոնազի և սնկային վագինոզի դեպքերի վարումը:
Մեթոդաբանություն
Սույն կլինիկական ուղեցույցը մշակվել է ՄԱԿ-ի Բնակչության հիմնադրամի «Երիտասարդների առողջության և մասնակցության խթանում » ծրագրի շրջանակներում: Ուղեցույցի աղբյուր են հանդիսացել Մեծ Բրիտանիայի սեռական առողջության և ՄԻԱՎ- ի ասոցիացիայի, Մանկաբարձ- գինեկոլոգների ամերիկյան քոլեջի, Հյուսիսային Ամերիկայի մանկական և դեռահասային գինեկոլոգիայի ընկերության, Կանադայի մանկաբարձների և գինեկոլոգների ընկերության, Ավստրալիայի սեռական առողջության դաշինքի, ԱՄՆ Մանկաբուժական ակադեմիայի 2015-2017 թթ. կլինիկական ուղեցույցները, ինչպես նաև PubMed և UpToDate շտեմարանների արդի տվյալները ։ Տեղեկատվության որակը գնահատելիս և ցուցումների ուժը որոշելիս սկզբնաղբյուր հանդիսացող փաստաթղթերում հիմք է ընդունվել Կանադայի գինեկոլոգների և մանկաբարձների կազմակերպության (SOGC), ինչպես նաև Մեծ Բրիտանիայի սեռական առողջության և ՄԻԱՎ- ի ասոցիացիայի (BASHH) կողմից առաջարկվող դասակարգումը (տես Հավելված 1): Ուղեցույցի տեղայնացման գործընթացը իրականացվել է համաձայան միջազգային ADAPTE մեթոդաբանության: Հիմնական պնդումների վերջում նշված են ապացուցողականության աստիճանները՝ ըստ վերոհիշյալ աղբյուրների, համաձայն GRADE համակարգի: Կլինիկական ուղեցույցի դրույթները քննարկվել և հավանության են արժանացել ՀՀ մանկաբարձ- գինեկոլոգների և նեոնատոլոգների ասոցիացիայի կողմից ։
Սույն փաստաթուղթը ենթակա է պարբերական թարմացումների և/կամ խմբագրման յուրաքանչյուր 5 տարին մեկ կամ ավելի հաճախակի՝ կախված տվյալ ոլորտում նոր գիտագործնական տեղեկատվության ի հայտ գալուց, ինչպես նաև ուղեցույցի ներդրման արդյունքում քաղած դասերից: Ուղեցույցը նախատեսված է հիվանդանոցային և արտահիվանդանոցային օղակում գործող մանկական գինեկոլոգների համար:
